Sjálfbær Suðurnes á fundi Suðurnesjavettvangsins
![](/_next/image?url=https%3A%2F%2Fimages.prismic.io%2Fkefplus%2Fb05ab82b-fa91-4c86-868b-3b48bbd132f7_isaviasjalfbaerniapril2023.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1280%26h%3D720&w=3840&q=80)
Fjölmenni var á fundinum Sjálfbær Suðurnes sem haldinn var af Suðurnesjavettvanginum á dögunum.
Á fundinum var rætt um sjálfbærni í framkvæmdum og rekstri sveitarfélaga, orkuskipti í flugi, eldsneyti framtíðarinnar og þá nýjung sem felst í sameiginlegu kolefnisbókhaldi. Suðurnesjavettvangurinn er samstarf sveitarfélaganna fjögurra á Suðurnesjum – þ.e. Grindavíkur, Reykjanesbæjar, Suðurnesjabæjar og Voga, Isavia, Kadeco og Sambands sveitarfélaga á Suðurnesjum.
![](/_next/image?url=https%3A%2F%2Fimages.prismic.io%2Fkefplus%2Fcb9efafe-623a-4a8c-8584-1b0db906a486_isaviasjalfbaernigudlaugurapril2023-1.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1000%26h%3D667&w=2048&q=80)
Meðal gesta á fundinum voru Guðlaugur Þór Þórðarson, umhverfis- orku og loftslagsráðherra, sem flutti erindi um leiðina að árangri í loftslagsmálum. Þar fór hann m.a. yfir þau markmið að Ísland verði kolefnishlutlaust árið 2040 og óháð jarðefnaeldsneyti fyrst ríkja. Hann fór yfir áskoranirnar á veginum og hvernig væri verið að færa okkur nær þessum markmiðum með kortlagningu möguleikanna og aukinni samvinnu.
![](/_next/image?url=https%3A%2F%2Fimages.prismic.io%2Fkefplus%2F1669457e-b346-4e47-8601-632a1d1e19fe_isaviasjalfbaernihronnapril2023.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1000%26h%3D719&w=2048&q=80)
Hrönn Ingólfsdóttir, forstöðumaður stefnumótunar og sjálfbærni hjá Isavia, og Stefán Kári Sveinbjörnsson, verkefnastjóri hjá Isavia, fóru einnig yfir sjálfbærnivegferð félagsins. Þar var rætt um leiðina að kolefnisleysi í rekstri Isavia sem á að ná árið 2030. Farið var yfir kortlagningu á kolefnisspori Keflavíkurflugvallar sem hefur verið unnin, tæknilegar áskoranir fyrir mismunandi ný flugvélaeldsneyti vegna orkuskipta í flugi á Keflavíkurflugvelli og orkuþörf millilandaflugs sem áætlað er að verði orðin sem samsvarar að lágmarki 14,7-16,5 Svartsengis virkjunum árið 2050.